रसुवागढी जोड्ने सडकको त्रिशूली–बेत्रावती खण्ड मर्मत कार्यलाई सडक विभागले तिब्रता दिएको छ ।
सडक विभागको योजना महाशाखा प्रमुख शुभराज न्यौपानेकाअनुसार टोलीले बिहान साढे ६ बजेदेखि सूर्यास्तसम्म निरन्तर काम गरिरहेको हो । मर्मतका क्रममा मेसिनहरूले तिर्तिरे भीर पार गरिसकेका छन् र अब बेत्रावती पुग्न करिव ३ किलोमिटर सडक खण्ड बाँकी छ । यद्यपि, बेत्रावती नजिकैको करिव पाँच सय मिटर सडकखण्ड त्रिशूली नदीले पूर्ण रूपमा कटान गरी बगाएकाले मर्मत कार्यमा चुनौती थपिएको छ । न्यौपानेकाअनुसार बाढी र तिब्र बहावका कारण नदीले आफ्नो धार परिवर्तन गरी सडक भएकै स्थानबाट बग्न थालेको छ । उक्त खण्डमा नयाँ ट्रयाक निर्माणका लागि विभागले वैकल्पिक योजनासहित ब्रेकर र अन्य मेसिनहरू परिचालन गरेको छ भने आवश्यकता अनुसार ब्लास्टिङ (विष्फोट) गर्ने तयारी समेत गरिएको छ ।
उहाँले भन्नुभयो, ‘पहिले सडक भएको ठाउँमा अहिले खोला बगिरहेको छ, त्यसैले त्यहाँ नयाँ एलाइनमेन्टसहितको ट्रयाक खोल्नुपर्ने अवस्था छ ।’
विभागले भोलि बेलुकासम्म बेत्रावती पुग्ने लक्ष्य राखेको भएपनि बाढीले सडकमा पु¥याएको ठूलो क्षतिका कारण केही समय थप लाग्न सक्ने देखिएको छ । हाल शुभराज न्यौपानेको नेतृत्वमा त्रिशूलीदेखि बेत्रावती हुँदै स्याँफ्रुबेंसीसम्मको सडक सुचारु गराउन विभागको टोली कार्यक्षेत्रमा खटिएको छ । –न्युज एजेन्सी नेपाल
