रसुवास्थित भोटेकोशी नदीमा आएको विनाशकारी बाढीका कारण हालसम्म ५ सय ३८ जनाको मृत्यु भएको पुष्टि भएको छ । राष्ट्रिय विपद् जोखिम न्युनिकरण तथा व्यवस्थापन प्राधिकरणले बिहीबार दिउँसो ३ बजेसम्मको अद्यावधिक विवरण सार्वजनिक गर्दै विपद्मा परी ९ सय ७७ जना अझै बेपत्ता रहेको जनाएको छ । प्राधिकरणको प्रतिवेदनअनुसार बाढी र पहिरोका कारण चितवनमा सबैभन्दा बढी २ सय २१ जनाको शव फेला परेको छ । त्यस्तै, नवलपरासी पूर्वमा १ सय ३४, गोरखामा ४६ (विभिन्न मानव अङ्गसहित), नुवाकोटमा ३७, धादिङमा ३३, तनहुँमा २८, नवलपरासी पश्चिममा २७ र रसुवामा १२ जनाको शव फेला परेको छ । विपद्मा परी ७३ जना घाइते भएका छन्, जसमध्ये रसुवाका ४३, नुवाकोटका २७ र धादिङका ३ जना रहेका छन् ।
बाढीका कारण सम्पर्कविहीन हुनेको सङ्ख्या ९ सय ७७ पुगेको छ । यसमा सुरक्षा निकायका ८६ जना (नेपाली सेनाका ४५, नेपाल प्रहरीका २८ र सशस्त्र प्रहरीका १३), भन्सारका १५ र अध्यागमनका ४ जना कर्मचारी रहेका छन् । बेपत्ता हुनेमा ५ सय १७ जना विदेशी नागरिक र नेपाल घुम्न आएका १ सय २७ जना गैरआवासीय नेपाली समेत रहेका छन् । रसुवाबाट मात्रै १ सय ६१ जना बेपत्ता भएको विवरण प्राप्त भएको प्राधिकरणले जनाएको छ । 
खोज तथा उद्धार कार्यका लागि सरकारले ठूलो सङ्ख्यामा सुरक्षाकर्मी परिचालन गरेको छ । हालसम्म १४ हजार ८२९ सुरक्षाकर्मी कार्यक्षेत्रमा खटिएका छन्, जसमा नेपाली सेनाका ६ हजार ६९८, नेपाल प्रहरीका ४ हजार ४७३ र सशस्त्र प्रहरी बलका ३ हजार ६ सय ५८ जना रहेका छन् । 
उद्धार टोलीले हालसम्म ३ हजार ७ सय ४२ जनाको जीवितै उद्धार गरेको छ, जसमा २५ जना विदेशी नागरिक समेत छन् । उद्धारका लागि नेपाली सेना र निजी क्षेत्रका हेलिकप्टरमार्फत ७८ वटा हवाई उडान भरिएको जानकारी दिइएको छ । 
नेपाल सरकारले प्रभावित जिल्लाहरूका लागि तत्काल नगद राहत उपलब्ध गराएको छ । रसुवा र नुवाकोटलाई १–१ करोड रुपैयाँ तथा धादिङका लागि ५० लाख रुपैयाँ विनियोजन गरिएको छ । राहत सामग्री अन्तर्गत ३० ट्रक खाद्यान्न, बिस्कुट, स्लिपिङ ब्याग, म्याट्रेस र कम्बल प्रभावित क्षेत्रमा पठाइएको छ । साथै, दुर्गम क्षेत्रमा हेलिकप्टरमार्फत ४ पटक खाद्यान्न र गैरखाद्यान्न सामग्री ढुवानी गरिएको छ । प्रभावित क्षेत्रमा सञ्चार सम्पर्क सहज बनाउन थप सञ्चार सेटहरू समेत पठाइएको छ ।
नुवाकोटमा अत्यावश्यक इन्धनको पर्याप्त मौज्दात रहेको प्राधिकरणले जनाएको छ । त्यहाँका विभिन्न आयल स्टोरमा ४१ हजार लिटर डिजेल र २४ हजार लिटर पेट्रोल मौज्दात छ भने हवाई उडानका लागि ९ हजार लिटर हवाई इन्धन तयारी अवस्थामा राखिएको छ । थप इन्धन आवश्यक परेमा तत्काल पठाउने व्यवस्था मिलाइएको छ ।
प्राधिकरणले बेपत्ता भएका विदेशी नागरिक, उपचाररत व्यक्ति र उद्धार गरिएकाहरूको विस्तृत विवरण आफ्नो आधिकारिक वेबसाइट र फेसबुक पेजमार्फत सार्वजनिक गरिएको जनाएको छ ।–न्युज एजेन्सी नेपाल