चीनको दक्षिण–पश्चिम क्षेत्रमा पर्ने तिब्बत स्वशासित क्षेत्रको केरुङ नाकामा भीषण पहिरो गएपछि उद्धारकर्मीहरू बिहीवार अति प्रभावित क्षेत्रतर्फ अघि बढेका छन् । पहिरोले सडक सञ्जाल पूर्ण रूपमा बगाएपछि उद्धार कार्यमा ठूलो चुनौती थपिएको छ । प्रभावित स्थलसम्म पुग्ने मुख्य बाटो अवरुद्ध भएपछि उद्धार टोलीले पहाडको कठिन भू–बनोट र भीरपहरा छिचोल्दै पैदल यात्रा तय गरिरहेका छन् । उद्धार कार्यमा खटिएका सुरक्षाकर्मीहरूकाअनुसार सडक पूर्ण रूपमा क्षतिग्रस्त भएकाले हाल पहाडको टाकुराबाट घुमेर अर्कोतर्फ जानुपर्ने बाध्यात्मक अवस्था सिर्जना भएको छ ।
खोजी तथा उद्धार कार्यलाई थप प्रभावकारी र व्यवस्थित बनाउन आधुनिक प्रविधिको समेत प्रयोग गरिएको छ । प्रभावित क्षेत्रको वस्तुस्थिति बुझ्न र उद्धार टोलीलाई मार्गनिर्देश गर्न ड्रोनमार्फत हवाई निरीक्षण (एरियल सर्भे) भइरहेको छ । ड्रोनबाट प्राप्त दृश्य र तथ्याङ्कका आधारमा खोजी कार्यलाई तिब्रता दिइएको अधिकारीहरूले जनाएका छन् ।
सिन्ह्वाको सहयोगमा न्युज एजेन्सी नेपालले तयार पारेको समाचार सामग्री ।
